અમે મૈયારા રે ગોકુળ ગામનાં

અમે મૈયારા રે ગોકુળ ગામનાં
મારે મહી વેચવાને જાવા,
મૈયારા રે… ગોકુળ ગામનાં…

મથુરાની વાટ મહી વેચવાને નીસરી,
નટખટ એ નંદકિશોર માગે છે દાણજી,
હે… મારે દાણ દેવા નહીં લેવા,
મૈયારા રે… ગોકુળ ગામનાં…

યમુનાને તીર વાલો વાંસળી વગાડતો,
ભુલાવી ભાન સાન ઉંઘતી જગાડતો,
હે… મારે જાગી જોવું ને જાવું,
મૈયારા રે… ગોકુળ ગામનાં…

માવડી જશોદાજી કાનજીને વારજો,
દુ:ખડા દિયે હજાર નંદજીનો લાલો,
હે… મારે દુ:ખ સહેવા નહીં કહેવા,
મૈયારા રે… ગોકુળ ગામનાં…

નરસિંહનો નંદકિશોર લાડકડો કાનજી,
ઉતારે આતમથી ભવ-ભવનો ભારજી,
હે… નિર્મળ હૈયાની વાત કહેતા,
મૈયારા રે… ગોકુળ ગામનાં…